Мирзеханан акьалтIай алакьунар

Бажарагъ – аламатдин затI я ам. Мисал яз, гьар нивай хьайитIани шиирар теснифиз, манияр лугьуз, суьретрал чан гъиз, илимар муьтIуьгъариз жедач. Ибур анжах чпихъ акьалтIай алакьунар авайбурун тIем акакьдай крар я. Лугьуз жеда хьи, бажарагъ шукур хьайи Аллагьди инсандиз гузвай пай я.

КьетIен алакьунар, бажарагъ авай жегьилрикай яз чавай Россиядин Игит Радим Халикьован тIварунихъ галай юкьван школадин 11-классдин ученик, республикадин ва Вирироссиядин школьникрин олимпиадайра гъалибвилер къачур Алибалаев Мирзехан Казбековичан тIвар кьаз жеда.

Жуьреба-жуьре предметрай дерин чирвилералди Мирзехан неинки районда, санлай республикада хъсан, бажарагълу кIелзавайбурун арада ава. Им образованидин хилен пешекаррин фикир я.

Кьулан-СтIалрин школадин муаллимри чаз М. Алибалаеван алакьунрин «дувулар» и тухумдин «деринра» авайдини къейдна: Мирзехан 50-йисара СССР-да машгьур гамаринни халичайрин устад Рабият Алияровадин (Алибалаевадин) птул, дидедин патай 1917-йисуз Кьасумхуьрел сифтегьан светский школа ачухай Шагьрузат Султановадин хтул я.

Мирзехан 2007-йисан 21-мартдиз Кьулан-СтIалдал дидедиз хьана, 2013-йисуз ам 1-классдиз фена. Адан сад лагьай муаллим Абидат Мирзекеримова я.

Сифтегьан классдилай эгечIна М. Алибалаева школада анжах «5» къиметар аваз кIелзава, ам самбодал ва дзюдодал машгъул жезва, ада шахматрин секцияда ва кьуьлерин кружокда иштиракзава. Ам самбодай Дагъустан Республикадин кIвенкIвечивал патал тухвай акъажунрин гъалибчи я.

2021-2022 ва 2022-2023-кIе-лунин йисара М. Алибалаева химиядай, инглис чIалай, тарихдай, обществознанидай ва праводай Вирироссиядин школьникрин олимпиадайрин муниципальный этапра приздин чкаяр кьуна. Школадин общественный уьмуьрда ва «День тренингов» проектда активвилелди иштиракунай Мирзехан Чухсагъулдин чарчиз лайихлу хьана.

«Патриотизм как фундамент российской государственности» Вирироссиядин форумдин вилик Мирзехан Алибалаева «Золотое правило укрепления фундамента государственности» илимдин макъала кхьена, форумдин нетижайриз килигна макъала «Сборник тезисов, докладов и научных статей» кIватIалда гьатна.

М. Алибалаеван макъаладиз Татарстан Республикада чапдай акъатзавай «Молодой ученый» журналди фикир гана, макъала 2023-йисуз журналдин 5-нумрада гана. Илимдин макъала гунай «Молодой ученый» журналдин кьилин редактор, технический илимрин кандидат И. Ахметова Чухсагъулдин чар ва тIвар кхьенвай Шагьадатнама (Свидетельство СШ №06808521) рахкурна.

Гьа и 2023-йисуз хкягъуна гъалиб хьайи Мирзеханаз обществознание предметдай Россиядин ФСБ-дин ведомстводин образованидин организацийрин регионрин арадин олимпиададин финалдиз Москвадиз теклифна. Ана М. Алибалаевакай гъалибчи хьана.

И олимпиададин нетижайрай РФ-дин ФСБ-дин ДР-да авай Управлениди Махачкъалада тешкилай шадвилин мярекатдал Мирзеханав Диплом вахкана ва адаз ФСБ-дин музейда экскурсия тешкилна.

КIелуна ва общественный уьмуьрда кьетIен агалкьунрай 2023-йисуз ДР-дин образованидин ва илимдин министр И. Бучаева Чухсагъулдин чар гана.

Мадни, М. Алибалаев Россиядин школьникрин олимпиадайрин Советдин председатель, М. В. Ломоносован тIварунихъ галай МГУ-дин ректор В. А. Садовничийдин къул алай Дипломдиз лайихлу хьана ва Мирзехан «Таланты России» ГИР-дин государственный реестрдик кутунва.

2023-2024-йисара М. Алибалаева обществознанидай ва праводай Вирироссиядин олимпиадайрин региондин этапра гъалибвилер къачуна.

Хкягъунин нетижайрай М. Алибалаеваз обществознанидай Россиядин ФСБ-дин «Межрегиональная олимпиада школьников на базе ведомственных образовательных организаций», праводай «Фемида», праводай «Кутафинский», обществознанидай «Покори Воробьевы горы!» олимпиадайриз теклифна. Финалар Москвада кьиле фена. Вири олимпиадайра Мирзехана приздин чкаяр кьуна.

… Бажарагъ аламатдин затI я. Ам, лежбержди никIе цанвай къуьлуьн твар хьиз, фараш жезва ва са кьадар вахт алатайла, ада бегьер гузва.

Чун кIевелай инанмиш я хьи, М. Алибалаеван алакьунри, кьетIен бажарагъди са шумуд йисалай вичин бегьерни гуда.

Хазран Кьасумов

Шикилда: М. Алибалаев